AZƏRBAYCAN
Azərbaycan haqqında nələr bilirsiniz? Bəs nələr bilmək istəyərdiniz? Ehtimal ki, Azərbaycanın qədim adət-ənənələri haqqında, dünya tarixinə böyük təsir göstərmiş tarixi hadisələri haqqında, minlərlə insanın xəstəliklərinə dərman olan təbii şəfa mənbələri haqqında çox eşitmisiniz. Əlbəttə ki, təkrarolunmaz mətbəxi haqqında da eşitməmək qeyri-mümkündür (bu an dolmanın valehedici qoxusunu hiss etdinizmi?).
Gəlin Sizlərə, bir dəfə gördükdən sonra dəfələrlə qayıdacağınız əsrarəngiz Azərbaycan haqqında danışaq. İlk olaraq UNESKO-nun xəzinəsi olan, turistlərin ən çox marağına səbəb olan "İçəri Şəhərdən" bəhs edək. Təkcə dolğun tarixə malik olan küçələrə deyil, eləcə də qədimi qapılara və darvazalara diqqət yetirməyə deyər. Onlar o qədər rəngarəngdirlər ki, şəkil çəkdirmədən keçib getmək olmur. "Köhnə" şəhərdə unikal muzeylər mövcuddur. Onlardan biri "Miniatür Kitablar Muzeyi"-dir. Başqa harda ölçüsü 2 mm-dan 10 mm-dək olan kitab görə bilərsiniz? Bundan əlavə "İçəri Şəhərin" çoxsaylı qalereyalarında daima sərgilər keçirilir. Qeyd edək ki, məşhur müasir rəssam Əli Şəmsinin rəssamlıq emalatxanası da burada yerləşir. Onun istedadı təkcə emalatxananın içində deyil həmçinin çöl görünüşündə də əksini tapıb.
Demək olar ki, hər kəs "Qız Qalası" haqqında bilir, ancaq çoxlarının bilmədikləri maraqlı faktlar var. Onlardan biri budur ki, qalanın pəncərələri yuxarıya yönləndirilib və hər birindən Günəş sistemində olan bir planet görünür. Hədsiz sayda miflər və elmi araşdırmalar ilə əhatə olunmuş bu möhtəşəm abidənin üst meydançasından əlvan Bakıya mənzərə açılır.
Azərbaycanda ac qalmaq, və yaxud tox olub, amma narazı qalmaq mümkün deyil. Milli mətbəx nəfis mövzudur! Şəhərin hər tərəfində büdcəyə uyğun restoran və kafelər mövcuddur. Süfrənizi ilk olaraq qaynar təndirdən çıxmış isti təndir çörəyi bəzəyəcək. Aşbazın bişirdiyi yeməkləri "bəh-bəh" ilə yeməyiniz onun üçün ən böyük təşəkkür və təərifdir. Mütləq Azərbaycanın milli təamlarının dadına baxın. Onların mükəmməl dadı uzun müddət damağınızdan getməyəcək.
"Köhnə" şəhərdə etdiyiniz gəzinti zamanı təkrarolunmaz heykəllər və abidələrə rast gələcəksiniz (təkcə xalq şairi Əliağa Vahidin heykəli neyə desək dəyər!). Əfsanəvi mistik yerlər turistlər üçün əsil tapıntıdır.
Yerli əhali çox qonaqpərvərdir, onlar Sizlərə maraqlı tarix haqqında zövg ilə danışar hətta Sizləri milli "armudu" stəkanda "pürrəngi" çay içməyə dəvət də edərlər. "Armudu" stəkanda çay içmək sadəcə bir zövqdür.